АҚШнинг Мэриленд штатидаги Федералсбург посёлкаси яқинидаги майдонда 13 та оқ бошли бургутнинг ўлиги топилди. АҚШ рамзи саналган ва Америка гербида тасвирланган оқ бошли бургутларнинг оммавий ўлими нафақат маҳаллий табиат қўриқчиларини, балки жамоатчилик ва матбуотни ҳам оёққа турғазди, деб хабар қилади «ТАСС».
Бургутларнинг ўлими сабаби ҳозирча аниқланмади. «Ишчи фарази — заҳарланиш», — деди маҳаллий табиатни қўриқлаш полицияси вакили Кэнди Томсон.
У йиртқич қушларнинг каламушлар заҳаридан заҳарланган кемирувчиларнинг қолдиқларини еган бўлиши мумкинлигини ёки уларнинг ўлиги топилган майдонга янгича гербицид билан ишлов берилган бўлиши мумкинлигини истисно қилмади.
Томсоннинг сўзларига кўра, оқ бошли бургутларнинг оммавий равишда қирилиши штатда сўнгги 30 йил ичида кузатилмаган. Ушбу ҳодиса бўйича тергов ишлари бошланди. Иш бўйича берилган маълумот учун 2500 доллар миқдорида мукофот белгиланди.
Изоҳ (0)