Қодиров: «Терек» футбол клуби Тарасовни «Локомотив»дан жаримаси билан бирга сотиб олишга тайёр

Грозний (Чеченистон)нинг «Терек» клуби «Локомотив» ўйинчиси Дмитрий Тарасовни жарима билан бирга сотиб олишга ёки клуб маблағлари ҳисобидан футболчининг жаримасини тўлашни таклиф қилишга тайёр. Бу ҳақда Чеченистон Республикаси раҳбари, «Терек» фахрий президенти Рамзан Қодиров ўз Instagram’ида маълум қилди, деб ёзади «ТАСС».

«УЕФА ҳали қарор қабул қилганича йўқ, ўз клуби эса 300 минг евро жарима солиб ўтирибди… Дмитрий ҳақиқий эркакларга муносиб хатти-ҳаракатни амалга оширди, деб қатъий ишонаман. Шунинг учун ‘Терек’ Россиянинг бундай ватанпарварини ўз муаммолари билан ёлғиз қолдириш керак эмас, деб ҳисоблайди. ‘Терек’ ўйинчини жарима билан бирга сотиб олишга тайёр. Агар бу таклиф Дмитрий ва ‘Локомотив’ учун номақбул бўлса, жамоамиз ўз маблағлари ҳисобидан жаримани ёпиши мумкин», — деб ёзди Қодиров.

Эслатиб ўтамиз, «Фенербахче» билан учрашув якунлангач, Тарасов жамоа футболкасини ечган, шунда унинг остида Путиннинг ҳарбий либосда тушган сурати ҳамда «Энг хушмуомала президент» ёзуви жойлаштирилган бошқа футболка борлиги маълум бўлган эди. Кейинроқ «Локомотив» Дмитрий Тарасовнинг Путин сурати туширилган футболкасини намойиш этишини йўл қўйиб бўлмайдиган ҳолат, деб ҳисоблашини маълум қилган ва ўйинчини 300 минг евро жаримага тортган эди.