Жеймс Бонднинг «Спектр» фильмидаги автомобили 3,5 млн долларга сотилди

Лондоннинг Christie’s кимошди савдосида «007: Спектр» фильмидаги автомобиль 2,4 миллион фунт стерлинг (тахминан 3,5 миллион доллар) қийматида сотилди. Бу ҳақда Meduza хабар қилмоқда.

Фильм қаҳрамони, британиялик махсус агент Жеймс Бонднинг  Aston Martin DB10 русумли автомобилида 4,7 литр ҳажмдаги V8 бензинли двигатель ўрнатилган. Машина соатига 306 километргача бўлган тезликда юра олади.

2015 йил октябрь ойида жаҳон экранларига чиққан «007: Спектр» фильми учун жами ўн дона DB10 автомобили ишлаб чиқарилган. Суратга олиш жараёнида уларнинг саккизтасидан фойдаланилган. Яна иккита машина кўргазмаларда намойиш этишга мўлжалланган бўлиб, шундан биттаси кимошди савдосида сотилди.

Фильмда Жеймс Бонд ролини ижро этган актёр Дениэл Крейг эксклюзив автомобилда ўзининг дастхатини қолдирди. Лекин, сертификатланмаганлиги боис DB10 автомашинасини одатий йўлда бошқариш мумкин эмас.