Икки нафар ўзбекистонлик полвон спорт курашлари бўйича Осиё чемпионатида совриндор бўлди

Таиланднинг Бангкок шаҳрида спорт курашлари бўйича катталар ўртасида ўтказилаётган Осиё чемпионатида ўзбекистонлик юнон-рум курашчилари яна иккита кумуш медалга сазовор бўлди. Бу ҳақда Ўзбекистон Миллий Олимпия қўмитаси матбуот хизмати хабар қилмоқда.

Юнон-рум кураши бўйича икки кун давомида бўлиб ўтган мусобақаларда Дилшод Турдиев (75 кг), Нурбек Холмуҳамматов (71 кг) ва Муҳаммадали Шамсиддинов (85 кг) кумуш, Арам Варданян (66 кг) эса бронза медалига сазовор бўлди.

Натижада, учта кумуш ва битта бронза медалига сазовор бўлган юнон-рум кураши бўйича Ўзбекистон терма жамоаси 22 давлат вакиллари орасида тўртинчи ўринни эгаллади.