Аргентина ҳукуматининг собиқ раҳбари коррупцияда айбланди

Аргентина Федерал судьяси Клаудио Бонадио мамлакатнинг собиқ бош вазири Анибаль Фернандез ва Тукуман провинцияси губернатори Хуан Мансурга нисбатан коррупция бўйича айблов қўйди. Бу ҳақда Telesur телеканали берган маълумотларга асосан «РИА Новости» хабар қилмоқда.

Маълум қилинишича, айбланувчилар Quinta ижтимоий дастури доирасида кам таъминланган ҳомиладор аёлларга мўлжалланган ёрдамни сунъий равишда оширилган нархларда харид қилишга ва уюштирилган тендерларда аниқланган коррупцияга алоқадор бўлган.

Ҳомиладор аёлларга кўрсатиладиган бу турдаги ёрдам Мансур Соғлиқни сақлаш вазири лавозимини эгаллаб турган вақтда бошланиб, ундан кейинги вазир Даниэл Гойян даврида ҳам давом эттирилган.

Суд айбланувчиларнинг 440 миллион песо (29,9 миллион долларга яқин) қийматидаги шахсий мол-мулкини вақтинча хатлашга қарор қилди.