Лола Тошкент кўчалари бўйлаб #BoburDay ҳештегини реклама қилди (фото)

Хонанда Лола 14 февраль — Заҳириддин Муҳаммад Бобур таваллуд топган сана муносабати билан Тошкент кўчаларида ўзига хос акция ўтказди ва жараённи Facebook саҳифасига фотосуратлар кўринишида жойлади.

«Эртага (суратлар 13 февралда жойланган) қандай кун? #BoburDay Валентин куни? Йўқ, унақасини эшитмаганман», — дея ёзган у.

Суратларда хонанда автобус ичидаги йўловчилар орасида, бир гуруҳ болалар орасида #BoburDay ҳештеги туширилган плакат билан турганини кўриш мумкин. Расмлардан бирида, ҳатто, автобус ҳайдовчиси ҳам ҳештегни тутиб турибди.

Постга фикр билдирганларнинг кўпчилиги ушбу акцияни қўллаб-қувватлаб, Лоланинг қўшаётган ҳиссасини юқори баҳолаган. Бироқ унинг хатти-ҳаракатларидан киноя ёки «лицензиясини қайтариш учун уриниш» аломатларини қидирганлар ҳам бўлди.

Эслатиб ўтамиз, Ўзбекистон олий таълим муассасалари талабаларидан ташкил топган Ёшлар клуби томонидан 14 февраль, якшанба куни соат 14:00 дан бошлаб навбатдаги виртуал акцияга старт берилади.

Шу куни Twitter микроблоглар хизматининг ўзбекистонлик фаол фойдаланувчилари мутафаккир ва давлат арбоби Заҳириддин Муҳаммад Бобур таваллудининг 533 йиллигига бағишланган #BoburDay ҳештегини жаҳон трендига олиб чиқиш учун ҳаракат бошлайди.

Уларга ўзбек эстрадаси, кино санъатининг ёрқин вакиллари ҳам яқиндан ёрдам беради.

Акцияда барча ижтимоий тармоқларнинг фаоллари #BoburDay ёзуви (ҳештеги)ни ишлатган ҳолда пост қолдириб, иштирок этиши мумкин.