Ҳаводаги ифлосланиш оқибатида ҳар йили 5 миллиондан ортиқ одам ҳалок бўлади

Дунё бўйича 5,5 миллионга яқин одам ҳар йили ҳавонинг ифлосланиши оқибатида ҳалок бўлади. Бу ҳақда Америка фан тараққиёти уюшмаси маълумотига таяниб, «Корреспондент.net» хабар беради.

Электр станциялари, заводлар, транспорт, шунингдек, кўмир ёқиш натижасида ҳавода пайдо бўлувчи заҳарли микрозарралардан нафас олиш юрак касалликлари ва ўпка саратони билан касалланиш хавфини жиддий равишда оширади.

Тадқиқот натижаларига кўра, ҳавонинг ифлосланиши бошқа хавфли сабаблар — тўйиб овқатланмаслик, семириш ва гиёҳвандлик воситаларини истеъмол қилиш кабиларга қараганда кўпроқ ўлимга олиб келади.

Исфосланган ҳаво сабабчи бўлган ўлим ҳолатларининг ярмидан кўпи Хитой ва Ҳиндистонга тўғри келади. Баъзи маълумотларга қараганда, Хитойда йилига 1,6 миллионга яқин ўлим ҳолати ҳавонинг ифлосланиши билан боғлиқ, Ҳиндистонда эса бу кўрсаткич 1,3 миллионга яқинни ташкил этади.