Қодиров учинчи чечен уруши эҳтимолини истисно қилди
Чеченистон ҳукумати учинчи чечен уруши юзага келишига йўл қўймайди. Бу ҳақда республика раҳбари Рамзан Қодиров куч тизимидаги раҳбарлар билан учрашув вақтида айтиб ўтди, деб хабар қилади «РБК».
«Дин, мураккаб иқтисодий вазият, сиёсий усулларни қўллаган ҳолда бизга ҳужум қилишаётганини тушунишимиз лозим. Улар чеченларни аҳмоқ деб ўйлаб, улардан учинчи марта ҳам фойдаланиш мумкин деб ҳисобламоқда. Йўқ, бир марта фойдаланишди, иккинчи марта ҳам фойдаланишди. Учинчи сафар бўлмайди», — деди Қодиров.
Чеченистон етакчисининг фикрича, асосий эътиборни ёшлар билан ғоявий ишлар олиб боришга қаратиш керак.
Январь ойининг охирида Қодиров журналистлар билан суҳбатда республикада учинчи уруш юзага келишига йўл қўймаслик учун турмада ўтиришга тайёрлигини билдирганди.
