Бавария полицияси поездларнинг тўқнашуви оқибатида 9 киши ҳалок бўлганлигини тасдиқлади

Баварияда икки поезднинг рўпарадан тўқнашуви оқибатида қурбон бўлганлар сони тўққиз кишига етди. Бу ҳақда полиция берган маълумотларга асосан «Ведомости» хабар қилмоқда.

Шунингдек, Sueddeutsche Zeitung нашри 90 нафар йўловчининг зарар кўрганлигини ва 18 нафар кишининг оғир тан жароҳати олганлигини маълум қилган.

Олдинроқ 150 нафар йўловчи тан жароҳати олиб, улардан камида 10 нафарининг аҳволи оғир эканлиги хабар қилинган эди.

Ҳодиса дарё ва ўрмон ўртасидаги айланадан ўтган бир йўналишли темирйўлда содир бўлган. Махсус техниканинг воқеа жойига етиб бориши қийин бўлмоқда.

Поездларнинг тўқнашиб кетиши сабаблари ҳозирга қадар номаълум. Иккала поезднинг ҳайдовчиси ва бошлиқлари ҳалок бўлган. Қутқарув ишларида юзлаб одам иштирок этмоқда.