Буюк Британия Россия ва НАТО ўртасида можаро юзага келса кучларни Европага кўчириш бўйича ўқув машғулотларини ўтказади
Буюк Британия қуролли кучлари Иорданияда кучлар ва техникани тезкор кўчириш режаси ишлаб чиқилувчи кенг кўламли ўқув машғулотларини ўтказади. Бу ҳақда The Daily Telegraph маълумотига таяниб, Meduza хабар беради.
Нашрнинг маълум қилишича, ўқув машғулотлари Сурия билан чегарадош бўлган Иорданияда ўтказилишига қарамасдан, улар ИШИДга қарши курашиш билан боғлиқ эмас.
«Шамол тўфони» (Shamal Storm) номини олган ўқув машғулотлари давомида Россия билан НАТО ўртасида қарама-қаршилик юзага келган тақдирда Британия бронетехникасининг анча қисмини Шарқий Европага кўчириш режаси ишлаб чиқилиши мумкин.
Британия Мудофаа вазирлиги расмий вакилининг маълум қилишича, Иорданияда ҳар йили ўтказиладиган ўқув машғулотлари Британия армиясининг дунёнинг исталган нуқтасида 30 минг кишигача бўлган қуролли кучларни қўллаб-қувватлаш ва кенгайтириш учун тўлиқ жанговар шай ҳолатини таъминлаши лозим.
