Жорий йилнинг 4 февраль куни Тошкентдаги «Шайх Зайниддин» жомеъ масжидида Умра—2016 баҳорги мавсуми бўйича гуруҳ раҳбарлари иштирокидаги дастлабки йиғилиш бўлиб ўтди. Бу ҳақда Ўзбекистон мусулмонлари идораси Халқаро алоқалар бўлими маълум қилди.
Унда Дин ишлари бўйича қўмита масъул ходимлари М.Йўлдошев, Д.Бабаджанов, ЎМИ Халқаро алоқалар бўлими мудири М-А. Шакиров, ЎМИ Масжидлар бўлими ходими М.Камолов ва гуруҳ раҳбарлари иштирок этди.
Тадбирда дастлаб М.Йўлдошев гуруҳ раҳбарларини ушбу шарафли ва масъулиятли вазифа билан қутлаб, уларни гуруҳ раҳбарлиги қонун-қоидалари, бурч ва масъулиятлари билан таништириб ўтди ҳамда умра ибодати рукнлари, умра сафарига борувчи зиёратчилар билан ўтказиладиган йиғилишлар тартиби, унда эътибор қаратиш лозим бўлган жиҳатлар, сафарга жўнаб кетиш ҳамда Саудия Арабистонидаги ташкил қилинадиган ишларнинг элликбошиларга тааллуқли бўлган тарафларини атрофлича ёритди.
Сўнгра М-А. Шокиров сўзга чиқиб, сафарга доир ҳужжат ишларида нималарга эътибор қаратиш лозимлигини тушунтириб берди. Шунингдек, гуруҳдаги зиёратчилар билан ишлаш давомида уларнинг паспорт ва бошқа ҳужжатларини юритиш қоидалари борасида ҳам алоҳида тўхталди.
Йиғилишнинг давоми Республиканинг бир қатор вилоятларида ҳам бўлиб ўтади.
Эслатиб ўтамиз, кеча, 3 февраль куни Ўзбекистон Ҳаж делегацияси Ҳаж—2016 мавсумига тааллуқли ташкилий масалаларни келишиб олиш учун Саудия Арабистонига жўнаб кетгани хабар қилинганди.
Изоҳ (0)