Фотогалерея: Брюс Лининг ҳали сиз кўрмаган оилавий фотосуратлари

Брюс Ли миллионлаб томошабинларнинг севимли юлдузи эди. Жанговар санъат олами афсонасининг фалсафаси бугунги кунда ҳам дунё бўйлаб одамларни илҳомлантириб келмоқда, деб ёзади «1news.az».

Ли ўзи раҳбарлик қилаётган машғулотлар вақтида 17 ёшли талаба қиз — Линда Эмерли билан танишади. Линда бир кўришдаёқ келишган хитойлик йигитни севиб қолади. У Лининг гуруҳидаги машғулотларга ёзилган эди, кунларнинг бири эса Брюс Линдани ресторанга таклиф қилади. Кўп ўтмай, улар турмуш қуришади.

Кейинчалик улар буни бир кўришдаги муҳаббат бўлганини тан олган. Брюснинг кўзига Линда «осмондан тушган фаришта»дек кўринган. Ўз навбатида, қизга Брюснинг ўзига хос дид билан кийиниши жуда ёққан.

Брюс ва унинг бўлажак турмуш ўртоғи ўртасидаги биринчи учрашуви қиммат ресторанда бўлиб ўтган. Линданинг таъкидлашича, бу жуда романтик оқшом бўлган — улар Брюснинг болалик ва ўсмирлик даври ҳақида суҳбат қурган, фалсафа, психология ва ҳаёт режалар бўйича фикр алмашган.

Линданинг ота-онаси унинг хитойлик йигитга турмушга чиқишига қатъий қарши эди. Бироқ бу севишганларнинг йўлига тўғаноқ бўла олмади. Тўйдан кейин Брюс Ли ва Линда узоқроққа кўчиб кетиб, алоҳида уйда ўз ҳаётларини мустақил равишда қуришга киришди.

1965 йил 1 февралида Брюснинг тўнғич ўғли — Брендон Ли туғилади. Ўшанда актёр ўз фарзандини «Калифорниядаги ягона малла ва кўк-кўз хитойлик» деб атаган эди.

Ота ва ўғил ҳайратланарли тарзда бир-бирига ўхшарди. Брюс Ли Брендонга уч ёшидан кунг-фуни ўргатди. Беш ёшида эса болакай қўлда юриб, бир сакрашда отасининг даҳанига ета оларди.

1969 йили уларнинг иккинчи фарзанди — қизалоқ Шеннон дунёга келади. У отасининг йўлидан бориб, актриса ва кинопродюсер бўлди.

Голливуднинг аксарият юлдузларидан фарқли ўлароқ, Брюс Ли бутун ҳаёти давомида фақат бир марта оила қурган. Линда билан никоҳда тўққиз йил — ўлимига қадар бирга яшади.

Брюс Лининг фикрича, ён бера олиш — оилавий ҳаётнинг муваффақиятини таъминлайди. Унинг ўзи осонлик билан хотинига ён босиши мумкинлиги ҳақида журналистларга бир неча бор сўзлаб берган эди.

Брюс Лининг ўлимидан сўнг Линда Брюс Кедвелга турмушга чиқди ва ҳозирда Айдаҳода истиқомат қилади.