Эрон чемпионатида Фозил Мусаев Александр Лобанов дарвозасини ишғол қилди (видео)

2 февраль куни Эрон Про Лигасида 18-туридаги марказий ўйинда ўзбекистонлик икки футболчи Александр Лобанов ҳамда Фозил Мусаев ўйнаётган клублар ўзаро тўқнаш келди, деб хабар беради «Sports.uz».

«Персеполис» ўз майдонида азалий рақиби – «Сепахон»ни қабул қилди. «Эрон классикоси» анча шиддатли руҳда ўтди.

Диққатга сазовор жиҳати шундаки, ўзбекистонлик ҳар иккала футболчи ҳам ўйинни асосий таркибда бошлади. Ўзбекистон миллий терма жамоаси ярим ҳимоячиси Фозил Мусаев ўйиннинг 10-дақиқасида Александр Лобанов қўриқлаётган дарвозани ишғол этди. Аммо якунда жамоалар 2:2 ҳисобида дуранг ўйнади.

«Championat.asia» нашрининг қайд этишича, Мусаевнинг голи унинг Эрон чемпионатидаги дебют голи бўлди.

«Персеполис» – «Сепахон» 2:2 (0:1)Голлар: Али АлиПоор (50), Камолиддин Камёбий Ниа (74) — Фозил Мусаев (10), Лучиано Перейра Мендес (65).

Қуйида Фозил Мусаев киритган гол ва ўйин шарҳини кўришингиз мумкин.

Эслатиб ўтамиз, Мусаев «Сепахон» билан 2014 йил декабрида, Лобанов эса «Персеполис» билан 2016 йил январида шартнома имзолаган.