Фотогалерея: Футболчилар томонидан дабдаласи чиқарилган энг қиммат автомобиллар

Россиянинг «Спорт-Экспресс» нашри машҳур футболчилар иштирокидаги энг шов-шувли йўл-транспорт ҳодисаларини ёдга олди.

Макс Майер

«Шалке»нинг 20 ёшли ярим ҳимоячиси АҚШда ҳордиқ чиқараркан, 600 минг евро турадиган Lamborghini билан бирга йўлдан учиб чиқиб кетди. Автомобильни таъмирлаш ишлари 400 минг долларга баҳоланди, бироқ бу пулни суғурта қоплади. Футболчи бор-йўғи 28 евро жарима ва 2 минг евро солиқ тўлади. Ҳодиса натижасида ҳеч ким тан жароҳати олмади.

Артём Милевский

Киев «Динамо»сининг юлдузига тегишли Maserati 2011 йилда ёқиб юборилган бўлса, 2013 йил унинг 220 минг евролик Ferrari’сига жабр бўлди. Дастлаб, машинани Туркиядан олиб келишда унинг олд қисмини пачоқлаб қўйишди. Футболчи машинани таъмирлашга таъмирлади-ю, бироқ орадан кўп ўтмай, автомобилни қайта таъмирлаб бўлмайдиган аҳволга олиб келди: маст ҳолда автомобилни бошқариб, жиддий йўл-транспорт ҳодисасига учради.

Криштиану Роналду

«Манчестер Юнайтед»да ўйнаб юрган вақтларида, португалиялик футболчи 300 минг доллар турадиган Ferrari’ни бошқара олмай, тоннел деворига бориб урилди. Машина тўлиқ ишдан чиққан бўлса-да, футболчига ҳеч нарса қилгани йўқ.

Андрей Шевченко

«Милан»нинг собиқ ҳужумчиси 2009 йили ўзининг 200 минг долларлик Porsche Panamera Turbo автомобилида аварияга учради. ЙТҲнинг иккинчи иштирокчиси — Honda жипини бошқариб бораётган 24 ёшли ҳамшира «асосий йўл» қоидасини унутиб қўйганди...

Андрей Ешченко

Андрей Ешченко «Кубан»да ўйнаб юрган вақтлари Nissan GT-R’ни соатига 170 километр тезликка олиб чиқди, йўлдан учиб чиқиб, бетон тўсиқни ағдариб, устунга бориб урилди. Беш миллион рубллик машина қолдиқларига қараб, футболчига ҳақиқатан ҳам омад кулиб боққанига ишонасан киши.

Марио Балотелли

Италия футболининг хулқи оғир боласи камида икки марта аварияга учраган. «Манчестер Сити»да ўйнаётганида, унинг «Бентли»си «МЮ»нинг 18 ёшли фанати бошқариб бораётган автомобиль билан тўқнашиб кетганди. Италияда эса, қизил чироқда тўхтаб туришга сабри чидамай, газни босган ва Audi R8 ни расвосини чиқарганди.

Балде Кейта

«Лацио»нинг 19 ёшли футболчиси 250 минг долларлик Lamborghini Gallardo’да сайр қилаётганди, бироқ эртак узоқ давом этмади: ҳайдовчилик тажрибаси озлиги сабаб, футболчи тезликни ошириши билан, машина деворга бориб урилиб, бир уюм металлга айланди-қолди.

Артуро Видал

2015 йилги Америка Кубоги вақтида чилилик футболчи Ferrari’сида «мингга қўйиб» кетаётганида аварияга учради. Маълум бўлишича, у автомобилни маст ҳолда бошқарган.

Уэйн Руни

«Манчестер Юнайтед» ҳужумчиси ўз автомобилларининг қадрига етмайди. У ҳозирга қадар турли йўл-транспорт ҳодисаларида 170 минг фунтлик Aston Martin’ни, 65 минг фунтлик Range Rover’ни, 40 минг фунтлик Escalade’ни, шунингдек, қимматбаҳо Lamborghini Gallardo’нинг дабдаласини чиқарган.

Никлас Бендтнер

«Арсенал»да ўйнаб юрган кезлари, Бендтнер машғулотга бораркан, хаёлга берилиб, йўлдан чиқиб кетган. Оқибатда унинг Aston Martin’и ишдан чиққан, ўзи эса ҳозир «Вольфсбург»да ўйнаяпти.