Ўзбекистон мусулмонлари идораси ташаббуси билан Тошкент шаҳар ҳокимининг 2015 йил 11 декабрдаги қарорига асосан Тошкент шаҳри Яшнобод туманидаги «Жўрабек» жомеъ масжидини янгидан қуриш ишлари бошланди. Бу ҳақда Ўзбекистон мусулмонлари идораси Ахборот хизмати хабар бермоқда.

Foto: O‘zbekiston musulmonlari idorasi Axborot xizmati

Фото: Ўзбекистон мусулмонлари идораси Ахборот хизмати

Мазкур масжидни барпо этиш учун Тошкент шаҳар архитектура бошқармаси томонидан шаҳарсозлик меъёрлари ва қоидаларига мувофиқ равишда намунали лойиҳаси ишлаб чиқилди.

Ўзбекистон мусулмонлари идораси Ахборот хизмати «Жўрабек» жомеъ масжиди бойлар томонидан қайта қурилаётгани ҳақида тарқалган миш-мишларни рад этди.

«‘Масжидини фалон бойвачча ёки хориждаги фалончи бой қуряпти’ деган мутлақо асоссиз хабарлар тарқатилмоқда. Бу гаплар аслият ва воқеликка бутунлай мос келмаслиги шундоқ кўриниб турибди. Чунки ҳамма кўриб турибди-ку, ушбу масжидни янгидан барпо этишга диний идора ташаббус қиляпти, Тошкент шаҳар ҳокимияти эса ер ажратиш ишларига амалий кўмак ва бунёдкорлик ишларига моддий ёрдам бермоқда. Шунингдек, бундай бунёдкорлик ишига барча мутасадди ташкилотлар ўз ҳиссаларини қўшмоқда. Қолаверса, азалий қадриятимиз бўлган ҳашар йўли билан халқимиз ҳам кўмакчи бўлаётир», — дейилади Ўзбекистон мусулмонлари идораси Ахборот хизмати хабарида.

Эслатиб ўтамиз, 2015 йилнинг 25 апрелидан 26 апрелга ўтар кечаси Яшнобод туманидаги «Жўрабек» жомеъ масжидида ёнғин содир бўлганди. Бунга кучли шамол натижасида масжид томидан ўтган электр симларининг қисқа туташуви сабаб бўлган. Оқибатда масжиднинг асосий қисми жойлашган бино ёниб кетган. Ёнғиндан маъмурий хоналар жойлашган кичик бино ва таҳоратхонани сақлаб қолишга эришилган.