Христиан-социал иттифоқнинг (ХСИ) Бавариядаги Кройт аҳоли пунктида бўлиб ўтган тадбирида иштирок этган Германия канцлери Ангела Меркель қочоқларни қабул қилишга чеклов ўрнатиш тўғрисидаги даъватларни яна рад этди. Бу ҳақда «ТАСС» хабар бермоқда.
«Келгусида қочоқлар сонини сезиларли даражада камайтириш зарурлиги тўғрида қарашларимизда ўхшашлик бор. Бироқ Европа Итттифоқидаги барча давлатлар бу масалада якдил бўлсагина бунга эришиш мумкин», — дея таъкидлаган Меркель.
2015 йил якунлари бўйича Германияга 1,1 миллион муҳожир келган. Канцлер ХСИ талаб этганидек қочоқлар сонига чеклов ўрнатмаслигини бир неча бор такрорлаганди. Унинг айтишича, сонидан қатъи назар, бунга ҳуқуқи бўлганларнинг барчаси бошпана олиши керак, чунки мамлакат конституциясида шундай белгилаб қўйилган. Чеклов ўрнатиш учун эса асосий қонунни ўзгартириш лозим бўлади.
Эслатиб ўтамиз, олдинроқ муҳожирлар билан боғлиқ сиёсат туфайли Ангела Меркелнинг рейтинги рекорд даражада тушиб кетгани ҳақида хабар берилганди.
Изоҳ (0)