Москвадаги барча автобус ва троллейбуслар Wi-Fi билан жиҳозланади

2016 йилнинг охирига қадар «Мосгортранс» давлат унитар корхонасига қарашли барча автобус, троллейбус ва трамвайларда симсиз интернетдан текин фойдаланиш имконияти пайдо бўлади. Бу ҳақда «Мосгортранс» ДУК раҳбари Евгений Михайлов маълумотига таяниб, Meduza хабар беради.

Унинг сўзларига қараганда, автобус, троллейбус ва трамвайнинг 15—20 нафар йўловчиси бир вақтнинг ўзида тармоққа уланиши мумкин бўлади.

«Биринчи йўналишлар февралда интернетдан фойдаланиш имконияти билан жиҳозланади, бироқ синовдан ўтказиш ва созлаш учун яна бироз вақт талаб этилади. Шуни аниқ айтишим мумкинки, йил охиригача барча йўналишлар бепул Wi-Fi билан таъминланади», — деб таъкидлади «Мосгортранс» раҳбари.

Москва метрополитенида симсиз интернетдан фойдаланиш тизими 2013 йилда пайдо бўлган эди. Ҳозирги пайтда метронинг барча станцияларида Wi-Fi мавжуд.