Ўзбекистонда 2016 йилда 992,7 мингта янги иш ўрни яратилади

«Янги иш ўринларини яратиш ва аҳоли бандлигини таъминлаш дастури»га мувофиқ Ўзбекистонда 2016 йилда жами 369,9 мингта янги иш ўрни яратилади. Бу ҳақда Меҳнат ва аҳолини ижтимоий муҳофаза қилиш вазири Азиз Абдуҳакимов ОАВга берган махсус интервьюсида маълум қилди.

Мазкур иш ўринларининг 130,7 минги саноат соҳасида, 54,5 минги қишлоқ хўжалиги маҳсулотларини қайта ишлаш соҳасида (чорвачилик, паррандачилик, балиқчилик, асаларичилик, сабзавотчилик, ипакчилик, узумчилик),  56,6 минги қурилиш соҳасида, 39,7 минги ижтимоий инфратузилмада, 45,8 минги эса фаолияти тўхтаб қолган корхоналарнинг қайта тикланиши эвазига ташкил этилади.

Умумий ҳисобда, 2016 йилда 992,7 минг фуқарони иш билан таъминлаш режалаштирилмоқда. Шунингдек, «Меҳнат муҳофазаси тўғрисида»ги қонуннинг янги таҳрири қабул қилиниши кутилмоқда.

Азиз Абдуҳакимовнинг сўзларига қараганда, 2016 йилда вазирликнинг асосий вазифаси «Соғлом она ва бола йили» Давлат дастури ва 2020 йилгача ёлғиз кексалар, пенсионерлар ва ногиронларни ижтимоий ҳимоя қилиш тизимини ривожлантириш ва мустаҳкамлаш Давлат дастури мақсад ва вазифаларини амалга оширишдир.