Британиялик энг кекса аёл 113 ёшлигига ясама тиш сўради

Британия жанубидаги Райд шаҳрида яшовчи энг кекса аёл Гледис Хупер 18 январь, душанба куни 113 ёшга кириши муносабати билан бир пиёла чой, торт бўлаги ва янги ясама тиш сўради. Бу ҳақда The Telegraph хабар беради.

2015 йилнинг октябрида у Гиннеснинг Рекордлар китобига мамлакатнинг энг кекса одами сифатида киритилган эди.

12 йил давомида Хупер Райддаги қариялар уйида яшаб келади. У ерга туғилган кунни нишонлаш учун унинг қариндошлари ва дўстлари етиб келди. Хупернинг 85 ёшли ўғли Дерек Хермистоннинг сўзлаб беришича, унинг онаси профессионал пианиночи бўлган. «Ҳозир ҳам биз баъзан унинг бармоқлари пианино чалаётгандек ҳаракатланишини кўрамиз. Ўйлашимча, у шу тарзда ўтмишидаги мусиқаларни эслайди», — дейди Хермистон.

Хупер 1903 йилда Брайтонда дунёга келган.