Туркманистонда наркотик ва сигареталарни ёқиб юбориш бўйича оммавий акция ўтказилди

Туркманистонда ҳарбий муассасаларнинг махсус операциялари чоғида мусодара қилинган наркотиклар ва контрабанда тамаки маҳсулотларини ёқиб юбориш бўйича оммавий акция бўлиб ўтди. Бу ҳақда Туркманистон телевидениесига таяниб, «РИА Новости» хабар бермоқда.

Туркманистонда мунтазам равишда ўтказиб келинадиган наркотикларни йўқ қилиш акцияси чоғида биринчи марта мамлакатга контрабанда йўли билан олиб келинган сигареталар ҳам ёқилди.

Акция иштирокчилари махсус ўтхонага наркотик ўрамлари ва сигарета блокларини ўз қўллари билан ташлаш имкониятига эга бўлди.

Маҳаллий телевидение наркотик ва сигареталар йўқ қилинишини кўрсатишдан аввал Туркманистонга контрабанда тамаки маҳсулотлари олиб кирилишини ташкил қилган жиноятчилар гуруҳи қўлга олингани ҳақидаги сюжетни эфирга узатди.