Билл Гейтс саратонни аниқловчи универсал тестни ишлаб чиқаришга инвестиция киритди

Американинг Illumina компанияси саратон хасталигининг ривожланишини дастлабки босқичларида аниқлаш учун универсал тест ишлаб чиқариш бўйича лойиҳанинг бошланганлиги тўғрисида маълум қилди. Бу ҳақда MIT Technology Review нашри маълумотига таяниб, «РБК» хабар беради.

Grail номини олган лойиҳани амалга ошириш учун янги компания ташкил этилади. Лойиҳага аллақачон 100 миллион доллардан ортиқ маблағ киритилди. Лойиҳа учун Illumina компаниясининг ўзи, Microsoft асосчиси Билл Гейтс, Amazon интернет-ритейлерининг асосчиси Жефф Безоснинг инвестициявий фонди Bezos Expeditions, шунингдек, ARCH Venture Partners инвестициявий компаниялари инвесторлик қилмоқда.

Illumina қон таҳлили бўйича тестларнинг 2019 йилдан бошлаб қўллана бошланишини режалаштирмоқда. Тестни бир марта ўтказиш минг доллар атрофида бўлиб, уни одатдаги шифокорлар ҳузурида ёки махсус марказларда ўтказиш мумкин бўлади.

Таҳлил технологияси «суюқ биопсия» деб аталиб, унинг ёрдамида инсон қонидан саратон ҳужайраларининг ДНК фрагментлари қидирилади.