Хонанда ва актёр Шароф Муқимов онасининг бетоблиги сабаб ижодий фаолиятини вақтинча тўхтатишга мажбур бўлганини маълум қилди. Бу ҳақда у «Бекажон» газетасига берган интервьюсида айтиб ўтди.
«Оиламиз бошига оғир кулфат тушиб қолди. Онам оғир бетоб. Уларни оёққа турғазаман, деб ижодни ҳам йиғиштириб қўйгандим. Бундай вазиятларда хоҳ қиз, хоҳ ўғил бўлсин, фарзандга қийин бўларкан. Ҳозир у кишининг саломатликларини Худодан сўраб ўтирибмиз», — деди Шароф Муқимов.
«Онажонимга тикилиб, баъзан актёрликдан хабардорлигимдан хурсанд бўлдим. Чунки онам ҳозиргача ўзларининг қандай касал эканликларини билмайдилар. Уларга: ‘Сиз соғломсиз, сал чарчабсиз, дам олинг’, деб ишонтира оляпман, юрагимдаги дард-аламни кўрсатмасликка куч топяпман», — деди санъаткор.
«Онамнинг ёлғиз, эркатой ўғлиман. Шу боис бу ҳолатни қабул қила олиш, сингдириш осон эмас. Уларни даволатиш ниятида Ҳиндистонда олиб юрган ўн беш кун — ҳаётимдаги энг оғир кунларим... Худодан мўъжиза кутиб яшаяпман», — деди хонанда.
«Яхши ҳам дўстларим, яқинларим бор. Улар мени ҳаётга, ижодга бўлган қизиқишим, ишончимни қайтаришди. Онам учун ҳам кучли бўлишим кераклигини тушунтиришди», — дея қўшимча қилди Шароф Муқимов.
Изоҳ (0)