Миллиардер Алишер Усмонов 1980 йили Тошкентда сохта айблов билан озодликдан маҳрум этилган

Миллиардер Алишер Усмонов 1980 йили сохта айблов билан саккиз йилга озодликдан маҳрум этилган. Бу ҳақда Forbes журнали хабар бермоқда.

Алишер Усмонов 1976 йили Москвадаги Халқаро алоқалар институти халқаро ҳуқуқ факультетини тамомлаб, Тошкентга қайтган. «Ҳаёти бир маромда, муваффақиятли кетаётган эди, — деб ёзади Forbes. — Отаси Тошкент шаҳар прокурори, ўзи эса Ёшлар иттифоқи марказий қўмитасида катта референт, танишлар кўп, келажак порлоқ эди».

Бироқ 1980 йили Алишер Усмонов ва унинг икки дўсти — Ўзбекистон Давлат хавфсизлик қўмитаси раиси ўринбосарининг ўғли Баҳодир Насимов ва Ўзбекистон қишлоқ хўжалиги вазирининг ўғли Илҳом Шайхов фирибгарлик ва мулкни талон-тарож қилишда айбланиб, турли муддатларга озодликдан маҳрум этилган.

Алишер Усмоновнинг сўзларига кўра, йигитлар ўзларидан кўра, уларнинг ота-оналарига қарши қаратилган уруғ-аймоқчилик келишмовчиликлари қурбони бўлган. Бўлажак миллиардер ўшанда саккиз йилга озодликдан маҳрум этилган, олти йил ўтириб, 1986 йили муддатидан аввал озод этилган.

«2000 йили Ўзбекистон Олий суди ўша жиноят ишини сохталаштирилган деб топиб, судланганларни оқлаган», — деб ёзади Forbes.