БМТ Хавфсизлик кенгаши КХДРнинг ядро синовига жавобан резолюция бўйича дарҳол иш бошлайди

БМТ Хавфсизлик кенгаши КХДР томонидан ядро синови ўтказилишига нисбатан резолюция бўйича жавоб чоралари юзасидан дарҳол иш бошлайди. Бу ҳақда 6 январь куни Хавфсизлик кенгашига раислик қилувчи уругвайлик дипломат Элбио Росселли журналистларга маълум қилди, деб хабар беради «ТАСС».

Кенгаш аъзолари синовни қатъий қоралаб, уни Пхеньянга ядро қуроли ва баллистик ракета ишлаб чиқариш билан боғлиқ ҳар қандай фаолиятни тақиқловчи мавжуд резолюцияни жиддий бузиш деб баҳолади.

Росселлининг эслатиб ўтишича, 2013 йилда КХДР томонидан ер ости ядро портлаши амалга оширилгандан сўнг, Хавфсизлик кенгаши синовлар такрорланган ҳолатда жавоб чораларини қабул қилишга келишиб олган эди.

«Ушбу қарорга мувофиқ, Хавфсизлик кенгаши аъзолари ушбу чораларни ўз ичига олувчи янги резолюцияни ишлаб чиқиш бўйича дарҳол иш бошлайди», — деди у.

Резолюция КХДРга нисбатан амалда бўлган санкциявий режимнинг кенгайтирилишини кўзда тутиши кутилмоқда.