Қирғизистон ўз ҳудуди орқали газ транзити учун йилига 40—50 млн доллар олишни режалаштирмоқда
Қирғизистон ҳукумати Хитойнинг «Транс-Киргиз газ пайплайн компани лимитед» компанияси билан республика ҳудудида Туркманистон—Хитой газ қувури бир қисмининг қурилиши ҳақидаги келишувни имзолади. Бу ҳақда Қирғизистон Иқтисодиёт вазирлиги маълумотига таяниб, «ТАСС» хабар беради.
«Ушбу лойиҳа Қирғизистондаги йирик инвестициявий лойиҳалардан бири ҳисобланади. Уни амалга ошириш учун 1,5 миллиард долларга яқин маблағ талаб этилади», — дейилади хабарда.
Иқтисодиёт вазирлигининг дастлабки ҳисоб-китоблари бўйича, газ қувуридан фойдаланиш давомидаги газ транзити учун 35 йил давомида республика 2 миллиард доллардан ортиқ маблағни қўлга киритади.
Ушбу газ қувурининг Қирғизистон ҳудудидан ўтган қисмининг узунлиги 215 километрни ташкил этади. Республика бош вазири Темир Сариевнинг сўзларига қараганда, ҳар йили ундан 30 миллиард кубометргача газ ўтиб, транзит учун республика йилига 40—50 миллион доллар олишни режалаштирмоқда.
