Ўзбекистон Футбол Федерацияси 2015 йилнинг энг яхши мураббийи ва футболчисини аниқлаш бўйича Республика бўйлаб сўровнома бошланганлиги ҳақида эълон қилди.
2015 йилги сўровноманинг янада холислигини таъминлаш мақсадида унда журналистларнинг мустақил равишда тўғридан-тўғри иштирок этиши чекланади. Овоз бериш жараёнида таҳририятлар иштирок этади.
Сўровномада Ўзбекистон ва чет элдаги оммавий ахборот воситаларининг таҳририятлари овоз беради. Мустақил журналист, колумнист ва ньюсмейкерлар, шунингдек, спорт блогерларининг овозлари якунда мустақил журналистлар гуруҳи остида бирлаштирилади ва битта овоз сифатида сўровномада қатнашади. Футбол клублари ва терма жамоаларнинг матбуот хизматлари овози ҳам ягона «Матбуот хизматлари» гуруҳи остида бирлаштирилиб, ягона овоз сифатида сўровномада иштирок этади.
Йилнинг энг яхши мураббийи ва футболчиси номи (икки алоҳида номинация ҳисобланиб) умумий баллар йиғиндисига қараб аниқланади.
Ҳар бир таҳририят 3 нафар мураббий ва 3 нафар футболчини мукофотга лойиқлик даражаси бўйича биринчи, иккинчи ва учинчи ўринларга қўйиб чиқади. Иккала номинация бўйича ҳам 3 та қатор тўлдирилиши шарт.
Футболчи ва мураббийлар учун берилган овозлар қуйидаги тартибда ҳисобланади:
- 1-ўрин учун – 3 балл
- 2-ўрин учун – 2 балл
- 3-ўрин учун – 1 балл
Овоз бераётган таҳририят тўртта асосий критерияга риоя қилиши керак:
- 1. Йил давомидаги индивидуал ва жамоавий равишдаги ютуқлари
- 2. Истеъдод, иқтидор ва Fair Play.
- 3. Карьера
- 4. Шахсияти ва унинг бошқаларга таъсири
Таҳририят ўз овозини расмий мактуб билан ЎФФ Матбуот хизматининг электрон почтасига, шунингдек факс орқали жўнатиши лозим. Овоз бериш жараёни 2016 йилнинг 10 январь куни соат 09:00 да тўхтатилади.
Овозлар қуйидаги манзилга жўнатилади:
- Манзил: Ўзбекистон шоҳ кўчаси 98 А уй
- Факс: +99871 - 244-16-83. Email: media@the-uff.com
- Тошкент 100011
Изоҳ (0)