Маколей Калкин «Уйда ёлғиз» фильмида улғайган қаҳрамоннинг ролини ижро этди
«Уйда ёлғиз» фильмлари туркумида бош қаҳрамон ролини ижро этган актёр Маколей Калкин улғайган Кевин Маккаллистер ролини ижро этди. Бу ҳақда NME хабар қилмоқда.
:DRYVRS веб-сериалида 35 ёшли Калкин автомашинани бошқара олмайдиган ҳайдовчи ролини ижро этган. Натижада, йўловчи автомашинани бошқаришга ўтади ва ҳайдовчи унга ўзининг тарихини ҳикоя қилади. Такси ҳайдовчиси ўзини таништирмаса-да, у ёшлигида руҳий жароҳат олганлигини маълум қилади. Унинг сўзларига кўра, саккиз ёшлигида ота-онаси уни эсдан чиқариб, Рождество байрамида уйда қолдирган ва у бир ҳафта давомида ёлғиз яшашга мажбур бўлган.
«Уйда ёлғиз» фильмининг биринчи серияси 1990 йилда намойиш этилган. Етти ой давомида картина 476,6 миллион доллар миқдорида даромад келтирган. 1992 йилда эса фильмнинг сиквели «Уйда ёлғиз 2: Нью-Йоркда йўқолган» тақдим этилган. Ушбу картиналардаги бош ролни Маколей Калкин ижро этган.
