Туркиянинг жануби-шарқида жойлашган Хаккари вилоятидаги шифохона шифокорларининг илтимосига биноан номаълум ўғрилар компьютерларни қайтариб берди. Бу ҳақда CNN Turk берган маълумотларга асосан «РИА Новости» хабар қилмоқда.
Номаълум шахслар томонидан бир неча кун олдин Юксекова шаҳар шифохонасидан учта компьютер ўғирлаб кетилди. Беморларга тегишли бўлган барча маълумот ва касаллик тарихлари, шунингдек, барча тиббий ҳужжатлар ўғирланган компьютерларда бўлганлиги сабабли, тиббиёт ходимлари аҳолига тиббий ёрдам бермай қўйди. Шифокорлар маҳаллий ОАВ ва Оилавий тиббиёт маркази орқали ўғриларга мурожаат қилиб, компьютерлар қайтарилиши лозимлигини, акс ҳолда, тиббий ёрдамдан маҳрум бўлган одамлар, шу жумладан болалар азият чекаётганлигини маълум қилди.
Ўғрилар шифокорларни эшитди. 16 декабрь, чоршанба куни компьютерлар шифохонадан 500 метр узоқликда бўлган эски-туски нарсалар билан савдо қиладиган дўконга ташлаб кетилди.
Шифохона ишини тиклади. Полиция содир бўлган воқеа юзасидан суриштирув ишларини олиб бормоқда.
Изоҳ (0)