Ўзбекистонда ислоҳот дастурлари доирасида келаси беш йил ичида жами қиймати 60 миллиард долларлик 900 дан зиёд инвестиция лойиҳаларини амалга ошириш кўзда тутилган. Бу ҳақда 15 декабрь куни Ўзбекистон бош вазири биринчи ўринбосари ва молия вазири Рустам Азимов Чжэнчжоу шаҳридаги Шанхай ҳамкорлик ташкилотига аъзо мамлакатлар ҳукумат раҳбарлари кенгаши мажлисида айтиб ўтди, деб ёзади UzDaily.
«Жорий йилда Ўзбекистон Республикаси Президенти Ислом Каримов ‘2015—2019 йиллар учун ислоҳотлар, тузилмавий ўзгаришлар ва иқтисодий диверсификацияни амалга ошириш дастури’ни тасдиқлади, у Ўзбекистон иқтисодиётининг барқарор тараққиёти учун ишончли пойдевор қурадиган еттита стратегик дастурдан иборат», — деди Рустам Азимов.
Вазирнинг таъкидлашича, ушбу дастурлар ишбилармонлик муҳитини яхшилаш, давлат мулкини хусусийлаштириш, хусусий секторни кенгайтириш ва давлатнинг иқтисодиётдаги ҳиссасини камайтириш, саноат ва қишлоқ хўжалигини модернизация қилиш ва диверсификациялашга йўналтирилган.
Ўзбекистонда келаси беш йил давомида ислоҳотлар дастурларини амалга ошириш доирасида янги юқори технологияли ишлаб чиқаришлар яратиш, нефть-кимё, кимё саноати, электр энергетикаси, машинасозлик, автомобиль, тўқимачилик, фармацевтика саноати ва бошқа соҳалардаги мавжуд корхоналарни тубдан модернизация қилиш бўйича жами 60 миллиард долларлик 900 дан ортиқ инвестиция лойиҳаларини амалга ошириш кўзда тутилган.
Изоҳ (0)