Олимлар одамларнинг ўлимини кузатувчи смартфон дастурини яратди
Австралиялик шифокорлар ва дастурчилар қўл телефонлари учун одамнинг қачон ва нима сабабдан ўлганлигини аниқлаб берувчи ғайриоддий дастур яратишди. Бу ҳақда BMC Medicine нашри берган маълумотларга асосланиб, «РИА Новости» хабар қилмоқда.
Бу дастур Жаҳон соғлиқни сақлаш ташкилотига одамларнинг қандай ва нима сабабдан ўлишини аниқроқ кузатиб бориш имкониятини беради. Ташкилотнинг статистик маълумотларига кўра, дунёда вафот этаётган ҳар уч кишидан икки нафарида буни аниқлашнинг имкони бўлмай турибди. Бугунги кунда дунёдаги 180 дан зиёд давлатда ўлимнинг сабаби ва вақти ҳақида ишончли статистика юритилмаганлиги оқибатида, инсоният учун қайси касалликлар ва ўлимга олиб келувчи қайси сабаблар энг хавфли эканлигини аниқлашнинг имкони йўқ.
Австралия олимлари томонидан яратилган дастур ёрдамида вафот этган одамнинг яқин қариндошлари, унинг касалликларига тегишли ўнлаб саволларга жавоб бериб ва имкон даражада унинг фотосуратларини шифокорларнинг махсус серверига юбориб, марҳумнинг ўлими сабабларини қисман аниқлай олади. Серверда фотосурат ва маълумотлар махсус алгоритмлар ёрдамида ўрганиб чиқилиб, марҳум яшаган ҳудудда ҳаёт кечиришнинг хусусиятлари ва тиббий аҳвол инобатга олинади ҳамда «виртуал кўздан кечириш» натижалари бир зумда яқин қариндошларга қайтариб юборилади.
