Британиялик дилер тошқиндан зарар кўрганларга машина ҳадя қилади

Британияда Kendal Honda автомобиль дилери Камбрия графлигида рўй берган сув тошқинида жабр кўрган кишиларга бепул автомобиль тарқатишга қарор қилди, дея хабар бермоқда Motor компаниянинг Facebook саҳифасига таяниб.

Дилер таъкидлашича, машиналар ҳақиқатда унга эҳтиёжи бўлганларга берилади. Шунингдек, янги машина эгаларининг ўзи солиқ тўлаши ва суғурта ҳужжатини сотиб олиши керак бўлади.

Компания ҳар куни биттадан машина ҳадя қилмоқчи. Биринчи автомобиль 1999 йилги Mercedes-Benz C180 бўлди.

Эслатиб ўтамиз, аввалроқ Буюк Британияда тошқин туфайли мингдан зиёд киши эвакуация қилингани хабар берилган эди.

Англия шимоли ва Шотландия жанубида 200 дан ортиқ уй сув остида қолган. Бунга шиддатли ёмғирлар ва Атлантикадан келган довул сабаб бўлди.