Тожикистонда зилзила таъсирида тош кўчиши оқибатида бир киши ҳалок бўлди, дея хабар бермоқда «РБК» маҳаллий ОАВларга таяниб. Бунда гап Тоғли Бадахшон вилояти Ванч туманидаги автотрассада кетаётган юк машинаси ҳайдовчиси ҳақида бормоқда.
Автомобиль ҳаракатланаётган вақтда унинг устига тош ёғилган, натижада машина йўлдан четга чиқиб кетган. Яна иккита автомобилга зарар етган, бироқ ҳайдовчилар жабр кўрмаган.
Тожикистон ҳукумати қошидаги Фавқулодда вазиятлар қўмитаси маълумотларига кўра, зилзила эпицентри жойлашган Тоғли Бадахшон вилояти табиий офатдан энг кўп зарар кўрган. Жумладан, Бартанг туманидаги қишлоқлардан бирида ўн киши турли жароҳатлар олган.
Эслатиб ўтамиз, Тожикистонда 7 декабрь, душанба куни соат 12:50 да рўй берган зилзила Ўзбекистон шаҳарларида ҳам сезилди. «Тошкент» марказий сейсмостанциясидан маълум қилишларича, зилзила эпицентри Тошкент шаҳридан 430 километр узоқликда, Тожикистон ҳудудида бўлган, магнитудаси 7,3 га етган.
Изоҳ (0)