Шифокорлар Ёқутистонда (Россия) торт истеъмол қилиб, оммавий равишда заҳарланганларда стафилококк бактерияларини аниқлади. Бу ҳақда «ТАСС» хабар бермоқда.
Кейинги икки кун мобайнида Якутск шаҳридаги тиббиёт муассасаларига заҳарланиш аломатлари билан 58 киши, жумладан, 42 нафар бола мурожаат этган. Болалар инфекция касалхонасига бугунги кунда 31 нафар бола ётқизилган бўлиб, уларнинг ҳолати барқарор эканлиги айтилмоқда.
Шаҳарнинг 30 та савдо нуқтасидан заҳарланганлар тортини истеъмол қилган «Нарийаана» қандолат цехининг 60 килограмм маҳсулоти йиғиштириб олинди. Санитария қонун-қоидалари бузилгани аниқланган цех фаолияти вақтинча тўхтатилган, бино ва жиҳозлар муҳрлаб қўйилган. Маъмурий иш қўзғатилиб, унинг материаллари судга оширилиши билдирилмоқда.