Россия билан муносабатлар шу тарзда давом этса, энг нохуш сценарий бўйича Туркия тўққиз миллиард АҚШ долларини йўқотиши мумкин. Бу ҳақда Туркия бош вазирининг ўринбосари Меҳмет Шимшек берган маълумотларга асосан «Корреспондент.net» хабар қилмоқда.

Москва ва Анқара ўртасидаги муносабатлар Туркия Россиянинг Су-24 бомбардимончи самолётини Суриянинг чегарасида уриб туширгандан кейин кескинлашди. Бунга жавобан, Россия Туркияга нисбатан иқтисодий санкциялар жорий этди.

Вазир ўринбосарининг таъкидлашича, Россия билан бўлган муносабатлардаги кескинлик маъқул эмас, чунки Анқара ҳали ҳам уни «муҳим ҳамкор» деб билади. У шунингдек, Россиядан келадиган сайёҳлар оқимининг 603 минг кишига камайиб кетганлигини ва қурилиш-пудрат соҳасининг сустлашганлигини эътироф этди.

Бундан ташқари, Шимшекнинг таъкидлашича, Туркия идоралари томонидан Россия жорий этган санкциялардан келиб чиқиб, иқтисодий соҳада кўриладиган чора-тадбирлар режаси муҳокама қилинди.