Қирғизистонда экстремистик кўринишларнинг олдини олиш мақсадида дин ишлари бўйича давлат комиссияси қошида диний вазиятни ўрганиш маркази ташкил этилди. Бу ҳақда комиссия раҳбари Ўрозбек Молдалиев мамлакат президенти Алмазбек Атамбаев билан учрашуви чоғида маълум қилди, дея хабар беради «РИА Новости».

«Дунёда рўй бераётган воқеалардан келиб чиқиб, хавф-хатарларнинг олдини олиш мақсадида мамлакатда диний вазиятни ўрганиш бўйича ишларни кучайтириш лозим», — дея таъкидлаган Атамбаев.

Давлат комиссияси маълумотларига кўра, олти миллион аҳолиси бор Қирғизистонда 2,4 мингдан зиёд диний ташкилот мавжуд. Жумладан, 1700 дан ортиқ масжид, 10 та олий ислом ўқув юрти, 70 та мадраса фаолият кўрсатмоқда. Шунингдек, 378 та насроний йўналишдаги диний муассасалар ҳам рўйхатдан ўтган.