Ўзбекистон Президенти Ислом Каримов 5 декабрь куни Оқсаройда бир гуруҳ фуқароларга Ўзбекистоннинг юксак мукофотларини топширди. Бу ҳақда ЎзА хабар бермоқда.
Давлат раҳбарининг фармонларига мувофиқ Ўзбекистон Республикаси мустақиллигининг 24 йиллиги арафасида Ўзбекистонни ҳар томонлама ривожлантиришга катта ҳисса қўшган, эл-юрт тинчлиги ва осойишталигини мустаҳкамлашда фидойилик кўрсатган, жамиятнинг ижтимоий-иқтисодий, илмий-техник ва маънавий-маърифий ҳаётида алоҳида эътиборга сазовор бўлган бир гуруҳ фуқаролар давлат мукофотлари – фахрий унвонлар, орден ва медаллар билан тақдирланган эди.
Оқсаройда 5 декабрь куни ана шу юксак мукофотларни тантанали топшириш маросими бўлди.
«Бугун мана шу муҳташам залда сиз, азизларни Конституция куни билан табриклаб, сизларга самимий ҳурматимни изҳор этиб, барчангизга сиҳат-саломатлик, тинчлик-омонлик, янги-янги омадлар тилашга ижозат бергайсиз. Бугунги учрашувимиздан асосий мақсад – сиз, азизларга Ватанимизнинг мукофотларини – юксак унвон, орден ва медалларни топшириш, сизларни табриклаш, мен учун ўта шарафли вазифани адо этишдир.
Сизларнинг тимсолингизда давлат мукофотларига сазовор бўлган барча юртдошларимизга ҳам, ғойибона бўлса-да, чин қалбимдан чуқур ҳурматимни, эзгу тилакларимни билдириш ва қутлаш – менга катта мамнуният ва хурсандчилик етказади», — деди Ўзбекистон Президенти.
Сўнгра Ўзбекистон Президенти давлат мукофотларини тантанали равишда топширди.
«Бугун сизларнинг очиқ чеҳрангиз, бахтиёр кўзларингизни, сизлардаги баланд руҳни кўриб, очиғини айтсам, гўёки ўзим ҳам мукофот олгандек хурсанд бўлиб турибман. Менинг ниятим, тилагим битта: кўксингизга ярашиб турган бу мукофотлар барчангизга буюрсин, сизларни янги-янги ютуқ ва марраларга руҳлантирсин», – деди Ислом Каримов.
Изоҳ (0)