Ўзбекистон давлат консерваториясида қариялар ва ногиронлар учун маданий тадбир ўтказилди

Жорий «Кексаларни эъзозлаш йили»да Халқаро ногиронлар кунига бағишланган тадбирларни ҳар йилгидан фарқли ўлароқ маҳаллий ҳокимиятлар, идора ва муассасалар, нодавлат жамоат ташкилотлари ва жамғармаларининг фаол иштирокида кенг кўламда ўтказиш, жойларда ўтказиладиган инсонпарварлик (гуманитар) акцияларда ногиронларни имкон қадар кенгроқ қамраб олиш кўзда тутилмоқда. Бу ҳақда Ўзбекистон Республикаси Меҳнат ва аҳолини ижтимоий муҳофаза қилиш вазирлиги Ахборот хизмати «Дарё»га хабар бермоқда.

Вазирлик тизимидаги 33 та «Саховат» ва «Мурувват» уйларида 7,5 минг нафарга яқин ёлғиз кекса-қариялар, ногиронлар давлат томонидан тўлиқ таъминотга олинган.

Ҳар йили ўрта ҳисобда муҳтож ногиронлар 10 мингдан ортиқ протез-ортопедия маҳсулотлари, 3 мингга яқин муҳтожларга ногиронлар аравачаси, 1,3 мингдан зиёдига эшитиш мосламаси, 4 мингга яқин ҳасса ва қўлтиқ таёқ билан бепул таъминланмоқда.

Ўзбекистон Республикаси Вазирлар Маҳкамасининг мажлис баёнига биноан «3 декабрь — Халқаро ногиронлар куни»ни ўтказиш бўйича Ташкилий қўмита таркиби ва Қорақалпоғистон Республикаси, вилоятлар ва Тошкент шаҳрида ўтказиладиган чора-тадбирлар дастури тасдиқланиб, ижро учун жойларга етказилди. Мазкур топшириққа биноан, «3 декабрь — Халқаро ногиронлар куни» муносабати билан жорий йилнинг 30 ноябридан 30 декабрига қадар мехр-мурувват ойлигини ўтказиш орқали кенг нишонлаш кўзда тутилган.

Ушбу кунларда ногиронлар учун маданий тадбирлар ташкил этилиб, байрам дастурхонлари тузаб, уларга ҳомий ташкилотларнинг совғалари етказилади.

Давлат Консерваторияси биносида ўтказиладиган тадбирга таклиф қилинган ногиронларга, шунингдек, «Саховат» ва «Мурувват» уйларида истиқомат қилаётган қариялар ва ногиронлар, республикада фаолият кўрсатаётган ногиронлар жамиятларига Меҳнат ва аҳолини ижтимоий муҳофаза қилиш вазирлиги, Халқ таълими вазирлиги, «Нуроний», «Маҳалла» жамғармалари, Ўзбекистон касаба уюшмалари федерацияси кенгаши, Ҳукуматга қарашли бўлмаган «Соғлом авлод учун» Халқаро хайрия жамғармалари томонидан турли хилдаги совға-саломлар ҳадя этилди, ҳар бир ногиронга совға-саломлар улашилади.