Жанубий Корея молиявий назоратчилари Samsung корпорациясининг шўъба компаниялари — Samsung C&T ва Cheil Industries қўшилиши билан боғлиқ ҳолатлар текширувини бошлади. Корпорациянинг тўққиз нафар юқори мартабали менежери хизмат ваколатидан фойдаланиб даромад олишда гумон қилинмоқда. Бу ҳақда Bloomberg хабар берди.
Текширувлар мазкур менежерлар 2015 йил апрель ва май ойларида Cheil акцияларини ушбу компания Samsung C&T'га тегишли барча акцияларни харид этишини эълон қилгунига қадар сотиб олгани аниқлангач бошланди.
2015 йил май ойида Cheil Samsung C&T'ни 8 миллиард долларга сотиб олди. Келишув шартларига кўра, сотиб олинаётган компания акциядорлари Samsung C&T'нинг ҳар бир акцияси учун Cheil Industries'нинг 0,35 акциясига эга бўлган. Келишув ҳақида расман эълон қилингач, Cheil қимматли қоғозлари нархи 19 фоизга кўтарилиб кетган.