Тошкентлик аёл Telegram’да Меҳрибонлик уйи учун хайрияга деб пул йиғиб, алдаб кетгани хабар берилди

Facebook’даги «Волонтери.уз» гуруҳи аъзоларидан бири Меҳрибонлик уйида Янги йил байрами ўтказиш баҳонаси билан ушбу гуруҳ номидан пул йиғган, бироқ маблағ кассага келиб тушмаган, дея хабар бермоқда «Потребитель.уз»  фойдаланувчиси.

Аниқлик киритилишича, аёл Telegram мессенжерида «Волонтери» номи остида гуруҳ очиб, у ерга Facebook’даги «Волонтери.уз» гуруҳининг постларини жойлаган, боғланиш учун ўз телефон рақамини қолдирган. У ерда йиғган маблағи эса расмий гуруҳнинг кассасига тушмаган, шунингдек, гуруҳ ҳамкорлик қиладиган Меҳрибонлик уйларига ҳам топширилмаган.

«Афсуски, маблағ умумий кассага келиб тушмади, шунинг учун барчани огоҳлантираман, у аёлнинг ‘Волонтери.уз’ гуруҳига ҳеч қандай алоқаси йўқ!» — деб ёзди у ҳамда хайрия мақсадида буюмлар ва пулларни унга топширмасликни сўради.

Фойдаланувчиларнинг баъзилари аниқ фактлар бўлмасдан туриб, уни фирибгарликда айблаш нотўғри деб ҳисоблади. Бироқ пост муаллифи аёлнинг гуруҳ қоидаларига зид иш тутганини таъкидлаган. Унинг ёзишича, агар гуруҳ номидан иш кўрилса, гуруҳ маъмуриятини бу ҳақда огоҳлантириш ва йиғилган маблағни умумий кассага топшириш лозим.

Постга билдирилган фикрлардан маълум бўлишича, аёл Facebook ва Telegram’даги турли гуруҳларда муҳтожлар учун турли буюм ва кийим-кечаклар хайрия қилиш ҳақида қолдирган хабарлари орқали кўпчиликка яхши таниш бўлиб қолган. Баъзилар унинг шубҳалилигини аллақачон англаган бўлса, қолганлар учун бу янгилик бўлди.

Фойдаланувчиларнинг кўпчилиги бу шубҳали аёлни топиб, тегишли жазо берилишига эришиш кераклигини қайд этган, яна кимлардир уни худога солган.