ЖЧ—2018 саралаш баҳслари доирасида 12 ноябрь куни Тошкентда ўтказилган КХДРга қарши ўйинда гол урган ҳужумчи Александр Гейнрих Ўзбекистон миллий терма жамоасидаги голлари сонини 30 тага етказди. Бу ҳақда «Stadion.uz» хабар бермоқда.
Айи вақтда Қозоғистоннинг «Ордабаси» футбол клубида фаолиятини давом эттираётган футболчи Миржалол Қосимовнинг натижасини такрорлади.
Александр миллий терма жамоадаги 85-ўйинида мазкур натижани такрорлаган бўлса, Қосимов терма жамоада ўтказган жами 66 ўйинида 30 та гол уришга муваффақ бўлганди.
Гейнрих ҳам, Қосимов ҳам миллий терма жамоа тўпурарлари рўйхатида 2-ўринни эгаллаб турибди. Рўйхатда ҳужумчи Максим Шацких пешқадам — у 60 учрашувда 34 та гол урган.
КХДРга қарши ўйинда ҳисобни тенглаштирган Игорь Сергеев миллий терма жамоадаги 10-, КХДР дарвозасига учинчи голни урган Одил Аҳмедов эса термадаги 15-голини ўз ҳисобига ёзди. Учрашув 3:1 ҳисобида Ўзбекистон миллий терма жамоаси ғалабаси билан якунланди.
Изоҳ (0)