Футбол бўйича Ўзбекистон миллий терма жамоаси 12 ноябрь, пайшанба куни Тошкентдаги «Пахтакор» марказий стадионида КХДР терма жамоасини 3:1 ҳисобида мағлуб этди. Учрашув ЖЧ—2018 ва Осиё Кубоги—2019 саралаш баҳслари доирасида ташкил этилди.
Учрашувда ҳисоб 2-дақиқада меҳмонлар вакили Ри Хёк Чол томонидан очилди. Бироқ Ўзбекистон миллий терма жамоаси тезкор голдан ўзини йўқотиб қўймади ва биринчи тайм ўрталарида ҳисобни тенглаштирди — 24-дақиқада Сервер Жепаровнинг қанотдан узатган пасини ҳужумчи Игорь Сергеев боши билан Шимолий Корея дарвозасига йўллади.
Иккинчи таймда устунлик тўлиқ Ўзбекистон миллий терма жамоаси томонидан бўлди. Тайм бошида захирадан майдонга тушган Александр Гейнрих терма жамоанинг майдондаги устунлигини ҳисобда акс эттиришга муваффақ бўлди — Сардор Рашидовдан тўпни қабул қилиб олган ҳужумчи КХДР дарвозабонини усталик билан доғда қолдирди.
Учрашув асосий вақти якунланишига уч дақиқа қолганида эса миллий терма жамоа сардори Одил Аҳмедов якуний ҳисобни ўрнатди — 3:1 ва Ўзбекистон миллий терма жамоаси кетма-кет тўртинчи ғалабадан сўнг «Ҳ» саралаш гуруҳидаги очколари сонини 12 тага етказиб олди. Гуруҳда пешқадамликни сақлаб қолган КХДР ҳисобида 13 очко бор, бироқ корейслар битта кўп ўйин ўтказган.
Бош мураббий Самвел Бабаян қўл остидаги Ўзбекистон миллий терма жамоаси саралаш босқичи доирасидаги навбатдаги ўйинларни 17 ноябрь куни сафарда Яман, 2016 йил 24 март куни Тошкентда Филиппин, 29 март куни Баҳрайн терма жамоасига қарши ўтказади.
ЖЧ—2018 ва Осиё Кубоги—2019 саралаш «Ҳ» гуруҳи, 6-тур учрашуви
ЎЗБЕКИСТОН — КХДР 3:1 (1:1)
Голлар: Игорь Сергеев (23), Александр Гейнрих (65), Одил Аҳмедов (87) — Ри Хёк Чол (2).Огоҳлантиришлар: Ислом Тўхтахўжаев (19), Сардор Рашидов (90) — Жонг Ил Гван (45), Жон Кванг Ик (57), Жанг Кук Чол (77).ЎЗБЕКИСТОН: 21. Александр Лобанов, 2. Егор Кримец, 4. Марат Бикмаев (15. Александр Гейнрих, 51), 5. Анзур Исмоилов, 7. Азиз Ҳайдаров, 8. Сервер Жепаров (6. Жасур Ҳасанов, 75), 9. Одил Аҳмедов, 10. Сардор Рашидов (14. Жавоҳир Соҳибов, 90+1), 11. Игорь Сергеев, 19. Виталий Денисов, 20. Ислом Тўхтахўжаев.
КХДР: 1. Ри Мёнг Гук, 3. Жанг Кук Чол, 4. Ри Кум Чол, 7. Ри Хёк Чол (20. Ким Сонг Ги, 86), 9. Пак Кванг Рёнг (10. Ан Вёнг Жун, 35), 11. Жонг Ил Гван, 12. Жон Кванг Ик, 13. Сим Хён Жин, 15. Ри Ёнг Чол, 17. Со Хён Ук (14. Со Кёнг Жин, 79), 23. Ри Чол Мёнг.
ҲАКАМЛАР: Алиризо Фағоний, Ризо Суҳандон, Муҳаммадризо Мансурий, Мовуд Бунёдифард (барчаси — Эрондан).
Изоҳ (0)