Савдо ва саноат бўйича Ўзбекистон—Британия Кенгаши ҳамраиси Барбара Ҳей Тошкентга ташриф буюрди

2015 йилнинг 3—7 ноябрь кунлари савдо ва саноат бўйича Ўзбекистон—Британия Кенгаши ҳамраиси Барбара Ҳей Ўзбекистон Республикаси бош вазирининг биринчи ўринбосари Рустам Азимовнинг таклифига асосан Тошкентга расмий ташриф билан келди. Бу ҳақда UzDaily хабар беради.

Барбара Ҳей Буюк Британия ва Ўзбекистон ўртасидаги савдо ва иқтисодий ҳамкорлик имкониятларини муҳокама қилиш учун ҳукумат аъзолари ҳамда халқаро ва чет эл ташкилотлари вакиллари билан учрашувлар ўтказди.

Ўзининг ташрифи давомида Барбара Ҳей Ташқи ишлар вазири Абдулазиз Камилов, Ташқи иқтисодий алоқалар, инвестициялар ва савдо вазири Элёр Ғаниев, Иқтисодиёт вазири Галина Саидова билан учрашди. У, шунингдек, бир қатор халқаро ташкилотлар, жумладан, Жаҳон банки, Осиё тараққиёт банки, Америка савдо палатаси ва Британия компаниялари ва қўшма корхоналар вакиллари билан музокаралар олиб борди.