INFOLIB—2015 миллий ахборот-кутубхона ҳафталиги доирасида Сардор Милано ва Сабина Мустаева билан ижодий учрашув ўтказилади

Алишер Навоий номидаги Ўзбекистон Миллий кутубхонасида 9—13 ноябрь кунлари INFOLIB—2015 IV Миллий ахборот-кутубхона ҳафталиги ўтказилади. Бу ҳақда кутубхона расмий сайти хабар берди.

Ҳафталик доирасида 30 дан ортиқ тадбирлар — тақдимотлар, ижодий учрашувлар, давра суҳбатлари, кўргазмалар, танловлар, маҳорат машғулотлари ва тренинглар, бадиий ва ҳужжатли фильмлар намойишлари, экскурсиялар, лотереялар, касбга оид тадбирлар, жамоат, ёшлар, халқаро ва ижтимоий ташкилотлар тақдимотлари ўтказилиши режалаштирилган.

Жумладан, 9 ноябрь куни академик Азиз Қаюмов ва профессор Динара Азимованинг «Пятерица изумлений» — Алишер Навоийнинг «Хамсат ул-мутахаййирийн» асари бадиий таржимасининг тақдимоти, 10 ноябрь куни Ўзбекистондаги Италия элчихонаси мусиқа кечаси ташкил этилади.

11 ноябрь куни Ўзбекистон халқ шоири Хуршид Даврон, 13 ноябрь куни эса Ўзбекистон халқ артисти Теша Мўминов билан «Юрак, сўйла абадиятдан» номли, 12 ноябрь куни эса халқаро мусиқа танловлари ғолиблари Сардор Милано ва Сабина Мустаева билан ижодий учрашувлар ўтказилиши режалаштирилган.

Мазкур тадбирлар билан параллел равишда Ўзбекистондаги нашриётларнинг янги адабиётлари ярмаркаси, Фанлар Академияси Асосий кутубхонасининг кўргазмаси, ҳужжатли ва бадиий фильмлар намойиши ва бошқа тадбирлар ташкил этилиши кўзда тутилган. Ҳафталик доирасида ташкил этиладиган тадбирларнинг тўлиқ рўйхати билан Миллий кутубхона сайтида танишиш мумкин.