Хитой Халқ Республикаси раиси Си Цзиньпин ва Тайвань президенти Ма Инцзю 7 ноябрь куни Сингапурда 1949 йилдаги Хитой фуқаролар уруши якунланганидан бери илк марта учрашди, дея хабар бермоқда «ТАСС».
Музокараларнинг асосий якунларидан бири Си Цзиньпин томонидан Тайванга Осиё инфратузилма инвестициялари банки ишида қатнашиш ҳақида берилган таклиф бўлди.
Бундан ташқари, Пекин вакили Хитойдагилар Тайваннинг халқаро масалалардаги иштирокка муносабатини тушунишини таъкидлади. «Агар бу ягона Хитой тамойилига зид келмаса, Тайвань халқаро ишларда қатнашиши мумкин», — деди у.
Хитой Халқ Республикаси раҳбарияти, шунингдек, яна бир бора Тайвань мустақиллигига йўл қўйиб бўлмаслигини қайд этди.
Ўз навбатида, Ма Инцзю Си Цзиньпин билан Сингапурда бўлиб ўтган суҳбатдан қониққанлигини билдирди. У Тайвань бўғозида тинчлик ва гуллаб-яшнашни қўллаб-қувватлашга қаратилган, беш банддан иборат таклифни илгари сурди.
Изоҳ (0)