Балтимор шаҳри маъмурияти қўлга олиш чоғида ҳалок бўлган Грейнинг оиласига 6,4 млн доллар тўлашга қарор қилди

Балтимор шаҳри маъмурияти (АҚШ, Мэриленд штати) 9 сентябрь, чоршанба куни ўлимида маҳаллий полиция ходимлари гумон қилинаётган 25 ёшли қора танли Фредди Грейнинг оиласига 6,4 миллион доллар товон тўланишини тасдиқлади. Маъмурият вакиллари ва ҳалок бўлган йигитнинг қариндошлари судга қадар музокара жараёнида шундай келишувга эришган. Бу ҳақда «ТАСС» хабар бермоқда.

Шаҳар учун бу тўлов анчайин йирик ҳисобланади, чунки 2011 йилдан 2014 йилгача полициянинг ноқонуний ҳаракатлари юзасидан ўтказилган 102 та суд муҳокамаси натижасида атиги 5,7 миллион доллар тўлаб берилган эди.

Эслатиб ўтамиз, 12 апрелда полициячилар Фредди Грейни қўлга олиш чоғида бўйнини деярли синдириб қўйган ва у бир ҳафтадан сўнг ўзига келмай оламдан ўтган эди. Шундан сўнг Балтиморда оммавий тартибсизликлар бошланиб, фавқулодда ҳолат жорий этилди, шаҳарга ҳатто Миллий гвардия қисмлари ҳам киритилди.

Маҳаллий суд ўтган ҳафтада Грейнинг ўлимида гумон қилинаётган олти нафар полициячининг ишини ҳар бирини алоҳида кўриб чиқишга қарор қилди.