Sotheby’s ўзининг собиқ раҳбарига тегишли ярим млрд долларлик коллекцияни сотувга қўяди
Sotheby’s аукцион уйига 1983—2005 йилларда раҳбарлик қилган ва шу йил баҳорида вафот этган миллиардер Альфред Таубманга тегишли санъат асарлари коллекцияси кимошди савдосига қўйилади. Бу ҳақда Meduza хабар бермоқда.
Пикассо, Модельяни, Ротко, де Кунинг каби рангтасвир усталарининг беш юзга яқин картиналаридан иборат коллекциянинг умумий қиймати 500 миллион доллар атрофида баҳоланди. Sotheby’s томонидан тарқатилган баёнотда таъкидланишича, бу шу пайтгача савдога қўйилган энг қиммат хусусий коллекция экан.
Таубман салкам 50 йил давомида тўплаган санъат асарлари Sotheby’s уюштирадиган тўртта кимошди савдосига қўйилади ва уларнинг биринчиси Нью-Йоркда, ноябрь ойининг ўрталарида бўлиб ўтади. Аукциондан тушган маблағ Альфред Таубман хайрия жамғармасини молиялаштиришга сарфланади.
