Итига яратган қулайлик учун хитойлик аёлга жарима жазоси хавф солмоқда

Хитойнинг Чунсин шаҳрида яшовчи аёлга автобус тирбандлигида итини ўриндиққа ўтқизиб, уни бошқа йўловчилардан қўриқлаганлиги учун 150 долларга яқин жарима жазоси хавф солмоқда. Бу ҳақда South China Morning Post хабар бермоқда.

Бу ҳолатдан ғазабланган гувоҳларнинг сўзларига қараганда, аёл итини қўлига олишдан бош тортиб, унинг ўрнига бошқа йўловчиларнинг ўтиришига йўл қўймаган. Аёл ўзининг бу ҳаракатини севимли уй ҳайвони учун алоҳида чипта олганлиги билан асослаган.

Шаҳарда уй ҳайвонларини жамоат транспортида олиб юриш тақиқланган. Автобус қарашли бўлган транспорт компанияси вакилининг таъкидлашича, аёл итини сумкасида олиб ўтганлиги сабабли автобус ҳайдовчиси уни пайқамаган.