Россияда ЙТХ инспектори ўз машинаси билан болалар ўтирган автобусни тўқнашувдан ҳимоя қилиб қолди
Россия Давлат йўл ҳаракати хавфсизлиги инспекцияси инспектори ўз ҳаётини хатарга қўйиб, тўқнашув олдини олди, дея хабар бермоқда «Газета.ru».
Ҳодиса Абакан — Ак-Савурак трассасида содир бўлди. Тўққизта автобус Йўл-патруль хизматининг патруль машиналари ҳамроҳлигида болаларни ёзги соғломлаштириш оромгоҳларидан олиб кетаётган эди. Кутилмаганда рўпарадан енгил автомашина учиб келди. Полициячи унга ўз машинасини тўсиқ қилиб қўйди ва шу тариқа, болаларни автоҳалокатдан сақлаб қолди.
Қарама-қарши тўқнашув натижасида патруль машинаси металл уюмига айланди. Инспектор кўплаб оғир жароҳатлар олди, у айни пайтда касалхонада ётибди.
Йўл-транспорт ҳодисасини келтириб чиқарган хорижий русумдаги машина ҳайдовчиси ва тўрт нафар йўловчиси ҳам жабрланди, улар орасида ўн ёшли бола ҳам бор.
