Россияда Путиннинг рейтинги бироз пасайгани маълум қилинди

Россияликларнинг 87 фоизи Владимир Путиннинг президентлик фаолиятидан қониқиш ҳосил қилмоқда. Бу ҳақда, «Левада-сентр» томонидан ўтказилган сўров натижаларига асосланиб, «Ведомости» хабар бермоқда.

Сўров 17—20 июль кунлари Россиянинг 46 ҳудудида истиқомат қилувчи жами 1,6 минг аҳоли ўртасида ўтказилган. Сўровномада иштирок этганларнинг 12 фоизи президентдан норози.

Қайд этиш жоиз, июнь ойида Путинни маъқуллаш рейтинги рекорд кўрсаткич – 89 фоизга етганди. Апрель—май ойларида Россия президентини аҳолининг 86 фоизи, январда 85 фоизи, 2014 йил июнида 86 фоизи, 2013 йил июнида 63 фоизи, 2012 йил июнида 64 фоизи қўллаб-қувватлаган эди.

Дмитрий Медведевнинг бош вазир сифатидаги ишини июль ойида россияликларнинг 65 фоизи маъқуллади, 33 фоизи қоралади. Сўровномада қатнашганларнинг 58 фоизи ҳукуматнинг фаолиятини маъқуллади, 41 фоизи ундан эса норози эканлигини маълум қилди. Аҳолининг 50 фоизи мамлакат парламентидан мамнун, 48 фоизининг эса кўнгли тўқ эмас.