ФИФА президентининг навбатдан ташқари сайлови 2016 йил 26 февралида бўлиб ўтади

Халқаро футбол федерацияси — ФИФА президентининг навбатдан ташқари сайлови 2016 йил 26 февраль куни бўлиб ўтади. Бу ҳақда, ташкилот матбуот хизматига асосланиб, «ТАСС» хабар берди.

Душанба куни Цюрих шаҳрида ФИФА ижроия қўмитасининг навбатдан ташқари мажлиси бўлиб ўтди ва унда ташкилот раҳбарининг навбатдан ташқари сайлови санаси белгиланди. Ташкилотга 1998 йилдан бери раҳбарлик қилиб келаётган Йозеф Блаттер сайловга қадар ФИФА президенти вазифасини бажариб туради.

Ташкилот регламентига мувофиқ, ФИФА президенти сайловида иштирок этиш ниятида бўлган номзодлар ўз аризаларини 26 октябрга қадар топширишлари керак.

18 июль, шанба куни Испаниянинг AS нашри УЕФА президенти Мишел Платини ФИФА президенти сайловига ўз номзодини қўйиши ҳақида хабар берганди.

Бунгача мазкур лавозим учун курашиш истагини франциялик собиқ футболчи Давид Жинола, «Бунёдкор»нинг бразилиялик собиқ устози Зико, ўтмишнинг машҳур ҳужумчиларидан бири Диего Марадона, Иордания шаҳзодаси Али бин ал-Ҳусайн, Либерия футбол уюшмаси президенти Муса Билити, ФИФАнинг собиқ вице-президенти, жанубий кореялик Чон Монжун билдирган эди.